اقوام متحدہ کی جانب سے شہدائے پاکستان کے لیے اعزازات کا اعلان کیا گیا۔ 25 مئی 2023 کو اقوام متحدہ کے امن مشن کی 75 ویں سالگرہ کے موقع پر اقوام متحدہ کے جنرل اسمبلی ہال میں خصوصی تقریب منعقد کی گئی۔
تقریب میں اقوام متحدہ کے امن مشن کے دوران جام شہادت نوش کرنے والے آٹھ پاکستانی شہداء کو اعزاز سے نوازا گیا۔ اقوام متحدہ کے سیکرٹری جنرل نے تقریب کی صدارت کی۔
اقوام متحدہ میں پاکستان کے قائم مقام مستقل نمائندے، سفیر محمد عامر خان اور کرنل راجہ افضال احمد نے سیکرٹری جنرل سے شہداء کے میڈلز وصول کئے۔ 8 شہداء میں 6 وہ شہید بھی شامل ہیں جنہوں نے 29 مارچ 2022 کو ڈیموکریٹک ریپبلک آف کانگو میں اقوام متحدہ کےسٹیبلائزیشن مشن کے ساتھ فرائض سر انجام دیتے ہوئے ہیلی کاپٹر حادثے کے دوران شہادت قبول کی۔
ان شہداء میں لیفٹیننٹ کرنل آصف علی اعوان، میجر فیضان علی، میجر محمد سعد نعمانی، نائب صوبیدار سمیع اللہ خان، حوالدار محمد اسماعیل، لانس حوالدار محمد جمیل خان شامل ہیں۔
حوالدار بابر صدیق نے اور نائیک رانا محمد طاہر اسلام نے سنٹرل افریقن ریپبلک میں اقوام متحدہ کے کثیر جہتی انٹیگریٹڈ سٹیبلائزیشن مشن کے ساتھ فرائض کی انجام دہی کے دوران جام شہادت نوش کیا
