علامہ اقبال اوپن یونیورسٹی میں سمسٹر بہار ۲۰۲۳ کے داخلوں کا آغاز کر دیا گیا۔ سمسٹر بہار2023ء کے پہلے مرحلے کے داخلے ملک کے چاروں صوبوں، آزاد کشمیر اور گلگت بلتستان میں ایک ساتھ 15جنوری سے شروع ہورہے ہیں جن میں سرٹیفکیٹ کورسز، مڈل ٹیک،میٹرک، ایف ا ے اور آئی کام کے داخلے 21فروری تک جاری رہیں گے جبکہ بی ایس(فیس ٹو فیس)، ایم ایس، ایم فل اور پی ایچ ڈی کے فارم 15جنوری سے 15فروری تک وصول کئے جائیں گے۔
دوسرے مرحلے کے داخلے یکم مارچ سے شروع ہوں گے جس میں ٹیچر ٹریننگ پروگرامز، ایسوسی ایٹ ڈگری(بی اے)اور بی ایس(او ڈی ایل)پروگرامز شامل ہوں گے۔ اِن پروگراموں میں پہلے سے داخل(جاری طلبہ)بھی داخلوں کے شیڈول کے مطابق اپنی انرولمنٹ کرسکیں گے۔
یونیورسٹی انتظامیہ کی کوشش ہے کہ تعلیم کے حصول سے کوئی بھی محروم نہ رہے، اس حوالے سے یونیورسٹی نے بلوچستان، گلگت بلتستان اور ضم شدہ قبائلی اضلاع کے لوگوں کے لئے میٹرک کی مفت تعلیم کی پالیسی شروع کر رکھی ہے۔ علاوہ ازیں اوپن یونیورسٹی ملک کی واحد جامعہ ہے جو معذور افراد، جیلوں میں مقید افراد اور خواجہ سراؤں کو مفت تعلیم فراہم کررہی ہے، غریب افراد کوبھی فیسوں میں خصوصی رعایت فراہم کی جائے گی۔ اِن اسکیموں سے استفادہ کے لئے یونیورسٹی کے ریجنل آفسز سے رابطہ کیا جاسکتا ہے۔
پہلے مرحلے میں پیش کئے جانے والے تمام پروگراموں کے داخلہ فارم اور پراسپکٹس یونیورسٹی کی ویب سائٹ پر 15جنوری سے آن لائن دستیاب ہونگے۔ داخلہ فارم اور پراسپیکٹس یونیورسٹی کے مین کیمپس، علاقائی کیمپسز /رابطہ دفاتر اور ملک بھر میں قائم کردہ سیل پوائنٹس میں بھی دستیاب ہوں گے۔ یونیورسٹی کی داخلہ پالیسی کے مطابق بی ایس/ایم ایس سی/ایم فل اور پی ایچ ڈی پروگراموں میں داخلہ حاصل کرنے کے لئے آن لائن اپلائی کرنا لازمی ہے جبکہ میٹرک اور ایف اے پروگراموں میں داخلہ فارم مینول اور آن لائن دونوں طریقوں سے جمع کیا جاسکے گا، فارم آن لائن جمع کرانے کی صورت میں داخلہ فارم پرنٹ کرکے یونیورسٹی کو بھجوانے کی ضرورت نہیں ہوگی۔
