عوام کی آسانی کے لیے ڈائریکٹوریٹ جنرل امیگریشن اینڈ پاسپورٹ نے پاسپورٹ کی فیس کی ادائیگی کے لیے آن لائن ایپلی کیشن متعارف کرا دی۔وفاقی حکومت کی جانب سے ’پاسپورٹ فی آسان‘ اقدام کے تحت متعارف کرائی گئی ایپ کے ذریعے لاکھوں افراد بینک کے باہر لائنوں میں لگے بغیر آن لائن فیس ادا کر سکیں گے۔
سوشل میڈیا پر پاسپورٹ فیس کی ادائیگی کے لیے آن لائن سروس کا افتتاح وفاقی وزیر داخلہ رانا ثنا اللہ کی جانب سے کیا گیا اور ان کی جانب سے اس اقدام کے حوالے سے سوشل میڈیا پر بھی ایک پیغام جاری کیا گیا۔
وزیراعظم شہباز شریف کے اسٹریٹیجک ریفارمز کمیٹی کے سربراہ سلمان صوفی نے بھی سوشل میڈیا پر بتایا کہ متعلقہ سروس کو عوام کے لیے فعال کر دیا گیا ہے۔ انہوں نے بتایا کہ اس ایپ کے ذریعے شہری ڈی جی آئی پی کے ویب پورٹل پر جا کر پے ماسٹر کے ذریعے پاسپورٹ کی آن لائن فیس ادا کر سکتے ہیں۔
